Во утринскиот извештај на ЦУК се додава дека засега нема потреба од поддршка на воздухопловните сили за гасење на пожарот, а се очекува огнените јазици целосно да бидат изгаснати во следните неколку часа
Пожарот што вчера попладне избувна кај скопското село Авјатовци, на територија на општина Илинден, е ставен под контрола и повеќе не се шири, информираат утринава од Центарот за управување со кризи (ЦУК).
Во утринскиот извештај на ЦУК се додава дека пожарот е сè уште активен на еден мал крак, на чие гаснење работат пожарникарите од скопската противпожарна бригада.
„Пожарот се гаснеше непрекинато во текот на целата ноќ од страна на скопските пожарникари и доброволци од локално население предводени од градоначалникот на Општина Илинден, Александар Георгиевски“,
информираат од ЦУК.
Оттаму додаваат оти засега нема потреба од поддршка на воздухопловните сили за гасење на пожарот, а се очекува огнените јазици целосно да бидат изгаснати во следните неколку часа.
„Голема благодарност до храбрите скопски пожарникари, храбрите доброволци од локалното население кои дадоа голем придонес во гаснењето на овој голем пожар, како и благодарност до храбрите пилоти на полициските хеликоптери и ер-тракторот на ДЗС“.
додаваат од Центарот за управување со кризи.
Во пожарот што вчера попладне избувна во скопско Ајватовци, зафатена беше шума на околу сто хектари.
ИЗВОР: 360stepeni.mk
