реклама
Бришење на 20% за албанскиот јазик во уставот и прифаќање на предлог законот за борба против корупција. Ако овие две барања не се прифатат, здружената албанска опозиција нема да даде поддршка за уставните измени, па секретарот на Алтернатива Зеќирија Ибрахими порача власта од Груевски да бара повеќе гласови.
„Сметаме дека тие уставни измени не треба да се направат без да се направат уште два конститутивни елементи на овие уставни измени, тоа се отстранување на навредливото име за албанскиот јазик во Уставот на Република Македонија и второто прашање на уставната санкција за незастареност на случаите на политичка корупција. Албанската опозиција е подготвена да гласа за уставните измени доколку заедно дојдат во Собранието. Ако не дојдат заедно, добро е да се разговара со Никола Груевски за да се обезбедат други пратеници бидејќи ќе ги немаат гласовите на албанската опозиција“, вели Зеќирија Ибрахими.
реклама
Запрашан за условите на албанската опозиција, премиерот Димитар Ковачевски рече дека секое барање што во својата дефиниција ги претставува граѓаните е легитимно, но за горенаведените барања вели дека е потребна поширока политичка дискусија.
Седницата со уставни измени е отворена и треба да се премине на гласање, но собранискиот спикер не закажува продолжение бидејќи власта нема обезбедено најмалку 80 пратеници кои би дале зелено светло. Премиерот денеска одбегна да одговори на прашањето, но изрази надеж дека Македонија ќе биде прва од регионот која ќе влезе во ЕУ.
реклама
