ТИРАНА (АА) – Албанија и врати 20 икони на Северна Македонија кои им припаѓале на нејзините цркви и манастири, а кои албанските власти ги заплениле пред неколку години, известува Анадолу.
Министерката за култура на Албанија, Елва Маргарити, напиша на социјалните мрежи дека по 10 години работа успешно го завршиле процесот на предавање на 20 икони кои им припаѓале на црквите и манастирите во Северна Македонија.
„Во име на албанската влада на мојата колешка Бисера Костадиновска – Стојчевска, и ги предадов овие икони запленети 2013 година и за кои се покажа дека се сопственост на соседната земја. И благодарам на македонската страна на плодната соработка и на сите албански и меѓународни институции кои беа дел од оваа операција. Уште еднаш албанската држава покажа дека е на страната на законот, давајќи позитивен пример во процесот на враќање на украдените, исчезнатите или изгубените предмети од културното наследство во земјите на нивното потекло, во согласност со меѓународните конвенции“, објави Маргарити.
Примопредавањето се одржа во националниот историски музеј во Тирана.
Албанските власти во 2013 година запленија стотина икони и уметнички дела кои биле украдени или препродавани.
