Со одлуката на грчкиот премиер Кирјакос Мицотакис да го предложи собранискиот спикер Константинос Тасулас за претседател на државата се согласуваат 34 отсто, а не се согласуваат 43 проценти од анкетираните, согласно истражувањето на јавното мислење спроведено од агенцијата „Alco“ за грчката телевизија „Алфа“, јави дописничката на МИА од Атина.
На прашањето дали Тасулас ќе одговори соодветно на должностите на претседател, 27 отсто одговараат позитивно, 14 проценти рекле „веројатно да“, 19 отсто дале негативен одговор, а 15 проценти рекле „веројатно не“.
Генерално за улогата на претседателот и колку е важна, 62 отсто од анкетираните сметаат дека е „малку“ или „не е воопшто“ важна улогата, а исто толку испитаници одговориле негативно на прашањето колку ги интересира шефот на државата.
На политичката сцена Нова демократија е стабилна на првата позиција со 26,5 отсто, втора е ПАСОК со 14,5 проценти, трета сила е Комунистичката партија, а следат СИРИЗА и Грчко решение.
Истражувањето на јавното мислење на „Alco“ за „Алфа“ било спроведено од 15 до 19 јануари со анкетирани 1.000 лица со право на глас.
Извор: kurir.mk
