ИСТАНБУЛ (АА) – Турскиот претседател Реџеп Таип Ердоган денес изјави дека праведниот став на неговата земја за Газа ќе биде потврден од историјата исто како што беше во Сирија, јавува Анадолу.
„Како што се докажа дека ние сме во право за Сирија, историјата ќе потврди дека сме биле во право и за кризата во Газа“, изјави Ердоган на настанот на Собранието на турските извозници во Истанбул.
Асад, лидерот на Сирија речиси 25 години, побегна во Русија откако антирежимските групи ја презедоа контролата врз Дамаск на 8 декември, ставајќи крај на режимот на партијата Баас, кој беше на власт од 1963 година.
„Се надеваме дека сонцето на слободата и правдата што изгреа над Сирија последните недели од 2024 година ќе изгрее и на небото над Газа во 2025 година“, изјави претседателот Ердоган.
Ердоган нагласи и дека Туркије е единствената земја која целосно ја прекинала трговијата со Израел.
Во мај, Туркије ја запре целата трговија со Израел, која изнесуваше околу 9,5 милијарди долари, во услови на тековната израелска геноцидна војна врз Газа.
И покрај резолуцијата на Советот за безбедност на ОН која повикува на итен прекин на огнот, израелската Армија ја продолжи геноцидната војна врз Газа во која од 7 октомври 2023 година се убиени речиси 45.600 жртви, главно жени и деца.
Турскиот претседател исто така се осврна и на извозот на Туркије, велејќи дека е зголемен на годишно ниво.
„Извозот на Туркије достигна рекордно високо ниво од 262 милијарди долари во текот на минатата година, што е раст од 2,5 отсто на годишно ниво“, објави денес претседателот Реџеп Таип Ердоган.
„Надворешнотрговскиот дефицит на земјата, кој изнесуваше 106,3 милијарди долари во 2023 година, се намали на 82,2 милијарди долари“, изјави тој за време на настанот во Истанбул.
„Соодносот на покриеност на извозот и увозот достигна 76,1 отсто во 2024 година, што е раст од 5,5 процентни поени на годишно ниво“, нагласи Ердоган.
„Само во декември извозот на земјата се зголеми за 2,2 отсто на 23,5 милијарди долари, што е уште едно рекордно ниво“, додаде тој.
Во врска со бруто-домашниот производ (БДП) на Туркије, Ердоган рече дека приходот по глава на жител во земјата, кој изнесувал 13.243 долари во 2023 година, се очекува да надмине 15.000 долари во 2024 година и да надмине 17.000 долари во 2025 година.
Тој рече дека Туркије има за цел да достигне раст од 4 отсто во 2025 година со поддршка на нето-извозот и основните капитални инвестиции.
„Туркије, со раст од 2,1 отсто во третиот квартал, постигна позитивни стапки на раст во последните 17 квартали“, потсети претседателот Ердоган.
Извор: Anadolu Agency (AA)
