Јаков и Аја се првите бебиња во новата година во Скопје. Машкото новороденче е прва рожба на скопјанката Сања Талевска, која се породила на Клиниката за гинекологија само неколку секунди по полноќ.
„Терминот беше планиран за јануари малку подоцна да биде, но нѐ изненади малку порано, не беше планирано, но еве, убав подарок за Нова година.“, вели Сања Талевска.
„Веќе се родени во Новата година пет бебиња. Дежурната екипа, со оглед на тоа дека почнува во 13 часот, вчера имале осум породувања. Имале доста напорна работа, додека другите луѓе најчесто во таа вечер се опуштаат и се забавуваат.“, вели Ирена Алексиоска Папестиев.
Неколку секунди по Јаков, на свет пристигна и Аја – приновата во семејството Етеми. Аја е една од четирите новороденчиња во Гинекологијата во Чаир во новогодишната ноќ.
„Имавме среќа да го добиеме првото дете една минута после полноќ, здраво женско дете – три кила и 110 грама, 50цм долго, коешто е во одлична здравствена кондиција, а исто така и мајката.“, вели Пранвера Изаири.
Министерот за здравство Арбен Таравари истакна дека е задоволен што во Скопје имало девет новороденчиња.
„Слушнавме и од двете мајки дека се пресреќни што условите во двете болници се супер и дека нивните деца се во многу добра состојба.“, вели Арбен Таравари.
Мајките беа посетени од Таравари заедно со Рози Мицкоска, сопругата на премиерот. Подароци имаше и од градоначалниците Данела Арсовска и Висар Ганиу.
ИЗВОР: ТВ 21
