Здружението „Гласен текстилец“ останува цврсто на ставот дека неделата мора да остане неработен ден, изразувајќи сомнеж во тврдењата на премиерот Христијан Мицкоски дека „75% од граѓаните би работеле во недела за двојна дневница“. Според претседателката Кристина Ампева, ваквите анкети се правени со вработени од јавниот сектор, а не од реалниот сектор, каде правата на работниците често се занемаруваат.
„Ниту еден работник од реалниот сектор, кој едвај го добива минималецот, не би сакал да работи во недела, кога повторно не му се исплатува прекувремен труд или работа за празник. Влада што се залага за семејни вредности треба да ја зачува неделата како ден за одмор“, изјави Ампева на социјалните мрежи.
Ампева повтори дека укинувањето на ова право би било удар за работниците. Таа повика на воведување евиденција за работното време што не може да се манипулира и строги казни за непочитување на трудовите права.
„Дотогаш, не си играјте со трпението на работниците, оти и тие што останаа ќе заминат,“ предупреди Ампева.
На последната собраниска седница, премиерот Мицкоски истакна дека конечната одлука за неработната недела ќе се носи по консултации со Економско-социјалниот совет, синдикатите и стопанските комори. Според него, можни се две решенија: или никој да не работи во недела или да се дозволи работа со двојна дневница и специјални договори со синдикатите.
Синдикатите и четиридневната работна недела
Од Сојузот на синдикати на Македонија (ССМ) остануваат доследни дека неделата е ден за одмор, кој ја зголемува продуктивноста и го подобрува квалитетот на животот на работниците. Тие дополнително предлагаат воведување четиридневна работна недела, концепт што веќе се применува во некои земји.
„Во демократските држави, неделата е време за семејство, личен развој и подигнување на културното и спортското ниво на граѓаните – најважниот ресурс на секоја држава,“ порачаа од Синдикатот.
И додека дебатата продолжува, работниците остануваат загрижени дека секоја промена во ова право ќе оди на нивна штета.
ИЗВОР: racin.mk
