30 доктори од Универзитетската клиника за респираторни болести кај децата бараат итно разрешување на В.Д директорката Каролина Симоновска, во спротивно се закануваат со штрајк и откази. Во писмото упатено кон Премиерот Мицкоски, Министерот за здравство Таравари и националниот координатор за здравство Ристо Симеонов, 30те доктори ја обвинуваат директорката Симоновска за бројни нерегуларности во управувањето на детската клиника – Козле, како и мобинг кон медицинскиот персонал.
Отворено писмо од 30 доктори од Детска клиника – Козле:
Оставки од бронхоскопскиот тим дадоа двајцата најискусни бронхоскописти затоа што инсистираа на совесно и професионално работење, а останатите доктори и сестри ги поддржаа и се изјаснија дека функционирањето на тимот е невозможно без нив. Директорката им се закануваше со отказ на ОРЛ специјалистите кои одбиваа да работат бронхоскопија со недоволно едуциран кадар. За да докаже дека не се во право, формира нов тим во кој единствен искусен бронхоскопист е пензиониран ОРЛ специјалист. На фиктивниот список фигурираат уште педијатри и инфектолог, кои никогаш немаат направено бронхоскопија и ОРЛ специјалист кој се уште се обучува. Списоци за приправност не постојат и кога ќе дојде итно дете под сомнение за вдишено туѓо тело, решението е да се прапраќа на Клиниката за ОРЛ.
Стручниот колегиум на детската клиника и директорката со демант, тврдат дека се работи за политички мотивирани обвинувања од мала група поединци во клиниката.
Демант од Директорката на Детска клиника:
Клиниката е комплетно екипирана, сите оддели работат непречено и за прв пат после 7 години амбулантите ги покриваат лекари специјалисти педијатри во тек на 24 часа. Во Бронхоскопскиот кабинет непречено се реализираат дијагностички и терапевтски бронхоскопски процедури од страна на стручни и специјализирани кадри.
Пред три месеци и опозициската СДСМ изнесе обвинувања кон директорката Симоновска во врска со отказите на специјалистите по бронхоскопија и ненабавување на потребни материјали за овој оддел. И во тој наврат, Симоновска ги демантираше обвинувањата тврдејќи дека клиниката има комплетен тим за изведување на бронхоскопија и располага со потребните материјали.
Извор: 24vesti.mk
