Граѓаните што имаат платежни сметки во „АЛТА банка“ АД Битола, но немаат платежни картички, од четврток, 5 ноември, ќе можат да подигнуваат готовина во главната филијала во Битола, соопшти Народната банка.
Исплатата ќе се врши на повеќе шалтери на улицата „Добривое Радосављевиќ“ бр. 21. Можноста е наменета за клиентите без картички, особено за пензионерите и примателите на социјална помош што ги добиваат средствата преку банката.
Ќе може да се подигнат до 20.000 денари, што е максималниот дозволен износ за повлекување во период од две недели.
Клиентите ќе добијат СМС-порака со денот и часот кога треба да дојдат. Од Народната банка апелираат да се почитуваат термините и да не се доаѓа порано или во денови кога лицето не е повикано, за да се избегнат гужви и долго чекање.
За граѓаните што нема да можат да пристигнат во определениот термин ќе бидат обезбедени дополнителни термини. Од 6 ноември, вклучително и во сабота, 7 ноември, филијалата ќе работи во две смени.
Шалтерите ќе служат исклучиво за подигање готовина, без извршување други трансакции.
Народната банка најавува дека се подготвува отворање шалтери за пензионери и приматели на социјална помош и во други градови, за што дополнително ќе ја извести јавноста.
