ПОДГОРИЦА (АА) – Претседателот на Комисијата за надворешни работи на Големото народно собрание на Република Туркије, Фуат Октај, рече дека Црна Гора е светла ѕвезда на регионот и дека има голем потенцијал за унапредување на турско-црногорските односи, особено во секторите на транспортот, инфраструктурата, туризмот и земјоделството, јавува Анадолу.
Октај вчера допатува во дводневна официјална посета на Црна Гора, а за Анадолу изјави дека остварил конструктивни средби со високи црногорски претставници, меѓу кои и претседателот на Црна Гора, Јаков Милатовиќ, претседателот на Парламентот на Црна Гора, Андрија Мандиќ, премиерот Милојко Спајиќ, министерот за надворешни работи Ервин Ибрахимовиќ и реисот на Исламската заедница во Црна Гора, Рифат еф. Фејзиќ.
„Ова е посета со многу интензивна агенда. Црна Гора и Туркије имаат заедничка историја од петстотини години. Туркије е исклучително влијателна во својот регион и е во фокусот на сите важни настани. Ние сме земја во економски развој, а Црна Гора е исто така исклучително значајна во регионот и е земја во развој од перспектива на иднината. Во себе ја негува мултиетничноста, мултикултурализмот и мултиконфесионализмот во мир и хармонија. Црна Гора е земја фокусирана на иднината со перспектива за полноправно членство во Европската Унија во 2028 година. Има силни и пријателски односи со соседните земји Босна и Херцеговина, Хрватска, Србија, Албанија и Косово. Црна Гора е блескава ѕвезда на регионот“, рече Октај.
Истакнувајќи дека на сите средби се разговарало за сите аспекти и потенцијали за подобрување на турско-црногорските односи и соработка, Октај рече дека контактите и дискусиите продолжуваат на сите нивоа на билатералните односи. Тој додаде дека на овие средби била покажана срдечност и заемна волја за унапредување на соработката во полето на парламентарната дипломатија.
„Туркије е трета земја по директни инвестиции во Црна Гора и ја постигнавме зацртаната цел од 200 милиони долари во трговијата, но видовме дека можеме значително да одиме над тоа, особено во делот на транспортот, железничката мрежа, копнените патишта и изградба на аеродром, каде што има конкретни можности за соработка и со задоволство гледаме дека нашите релевантни компании и институции веќе разговараат за тоа. На дневен ред е и изградбата на железница која би го поврзала пристаништето во Бар со остатокот од Европа“, рече Октај.
Укажувајќи на потенцијалите за подобрување на билатералната соработка во областа на здравството и туризмот, Октај рече дека Туркије и Црна Гора имаат сериозна соработка на полето на одбраната и одбранбената индустрија и додаде дека Црна Гора неодамна била на саемот EКСПО 2024 во Туркије и дека биле потпишани дополнителни договори за соработка.
„Видовме одличен потенцијал за соработка во туризмот и земјоделството. Црна Гора е земја во развој со фантастичен туристички потенцијал, а Туркије како земја која е домаќин на 60 милиони туристи годишно гледа можност за соработка“, рече Октај.
Потсетувајќи дека ја посетил и Турската стопанска комора во Црна Гора, како и Исламската заедница во Црна Гора, Октај рече дека постои голем потенцијал за соработка во граѓанскиот сектор.
Нагласувајќи дека има голем потенцијал за зајакнување на турско-црногорските односи и дека тој треба да се искористи, Октај рече дека Црна Гора е фантастична и пријателска земја.
„Во оваа прилика го поканувам светот на бизнисот, граѓанското општество во Туркије да бидат присутни овде во Црна Гора, чија цел е да се заврши процесот на интеграција во ЕУ до 2028 година. Овде има одлични можности и тие треба да се искористат, а и Владата и невладиниот сектор се согласуваат за ова и бизнисмените и граѓаните во двете земји топло ве прегрнуваат кога ќе видат дека сте Турци, а истото тоа важи и за Црногорците во Туркије“, рече Октај.
Извор: Anadolu Agency (AA)
