Високиот претставник на Европската унија (ЕУ) за надворешни работи и безбедносна политика, Жозеп Борел, денеска предупреди дека целиот Блиски Исток е на „работ на целосен оган што меѓународната заедница се чини дека не може да го контролира“.
На годишнината од нападот на Хамас врз Израел и почетокот на војната во Газа, Борел рече дека „ситуацијата само се влошува“.
„Луѓето во регионот се понесигурни од кога било и паднаа во бескрајна спирала на насилство, омраза и одмазда“, објави Борел.
Тој порача дека ЕУ „жали и отфрла“ каква било ескалација на насилството на Блискиот Исток, вклучително и ракетирањето на Хезболах, израелското бомбардирање на Либан, раселувањето на над еден милион Либанци и 60.000 Израелци, зголемените тензии поради иранските ракетни напади и „загрижувачките“ случувања на Западниот Брег.
Тој нагласи дека воените операции и оружјето меѓу сите страни „нема да му донесат иднина ниту на народот на Израел ниту на народот на Палестина“.
„Само политичко решение ќе донесе мир, безбедност и просперитет“, рече Борел.
Извор: 24vesti.mk
