Македонската железница е во многу тешка состојба со години наназад. Таа е се уште во минатото наместо да биде во иднината. Ние се сеќаваме на времето кога Македонски железници функционираа за транспорт и на стока и на патници. Не би кажал дека свесно се уништувала компанијата Македонски железници, но е заборавена. Железницата во Европа е конкурентен превоз и дури и повеќе се користи одошто другите средства за транспорт. вели експертот за транспорт и логистика и поранешен директор на МЖ Транспорт Никола Костов во СТУДИО 10 на ТВ 24.
– Треба да се има стратегија и визија за железницата од страна на државата затоа што државата е носител на јавен транспорт. Треба да се вклучат сите чинители во општеството за да се реформира железницата. Основното прашање е дали сака или не сака оваа држава да има железница. Железницата е скапа инвестиција, но долгорочно е исплатлива. Скапа е во однос на поставување инфраструктура и купување возила. И треба да се инвестира во двете. Нови возови на стара инфраструктура е како да возите мерцедес на макадамски пат. Кај нас имаме нови возови, но тие не можат да возат според нивните поставки од 160 километри на час. Треба да се направи нова солидна инфраструктура и треба да се процени што е тоа што нам ни треба и со која брзина сакаме да се движат возовите, вели Костов.
Според Костов, за Македонски железници оптимално е да се направи инфраструктура за возови што ќе се движат со брзина од 160 километри на час. Тој вели дека новата инфраструктура ако се прави треба да се побараат надворешни експерти затоа што ние немаме такви.
– Кај нас во МЖ се примаат луѓе во администрација, а ни треба кадар за одржување на инфраструктурата. Кај нас се носат партиски и нестручни кадри, кои немаат знаење. Железницата е бизнис, не е политика, вели Костов.
Извор: 24vesti.mk
