АНКАРА (АА) – Туркије и Албанија се членки на НАТО-сојузот кои имаат улога во зачувувањето на мирот и стабилноста во регионот на Балканот, изјави турскиот претседател Реџеп Таип Ердоган, јавува Анадолу.
Во турскиот главен град Анкара, Ердоган одржа прес-конференција со албанскиот премиер Еди Рама, кој престојуваше во еднодневна посета на Туркије.
Ердоган, исто така, истакна дека Албанија застанала на вистинската страна на историјата за време на гласањето во Генералното собрание на Обединетите нации (СБОН) изминатиот декември за итниот хуманитарен прекин на огнот во Појасот Газа.
Тој ја нагласи важноста на „солидарноста на Албанија со угнетениот палестински народ“ кој е изложен на израелските напади врз Газа повеќе од четири месеци, во кои се загинати околу 30.000 луѓе.
Ердоган се осврна и на терористичката организација ФЕТО, која го организираше неуспешниот државен удар во Туркије во 2016 година.
„Нема да ѝ дадеме можност на таа злобна мрежа која се обидува да ги затруе нашите односи, ќе ја продолжиме нашата борба против нив“, порача турскиот претседател.
Ердоган истакна дека Туркије го има зголемено обемот на трговска размена со Албанија на една милијарда долари, и дека сега настојува да го удвои на две милијарди долари.
Албанскиот премиер Рама ги коментираше израелските напади на Појасот Газа, велејќи дека е време за прекин на огнот, дека заложниците мора да бидат ослободени и дека Туркије е незаменлив актер во постигнувањето решение.
Извор: Anadolu Agency (AA)
