Врвните дипломати на Соединетите Американски Држави и Кина одржаа „искрена и конструктивна“ дискусија за прашања кои ги комплицираат нивните затегнати односи околу Тајван, ситуацијата во Јужното Кинеско Море, војната на Русија против Украина и синтетичките опиоиди, соопшти Стејт департментот.
Средбата меѓу американскиот државен секретар Ентони Блинкен и кинескиот министер за надворешни работи Ванг Ји на маргините на Минхенската безбедносна конференција беше контакт на највисоко ниво меѓу двете земји откако американскиот претседател Џо Бајден и кинескиот претседател Кси Џинпинг одржаа разговори кон крајот на минатата година во Калифорнија.
Портпаролот на Стејт департментот Метју Милер рече дека Блинкен ја истакнал важноста од одржување на мирот во Тајванскиот теснец, како и проширување на новите напори за борба против наркотици. Блинкен, исто така, изрази загриженост за поддршката на Кина за руската одбранбена индустрија, за која Вашингтон вели дека ја помага руската воена кампања во Украина.
Кинеското Министерство за надворешни работи соопшти дека Ванг ги повикал САД да ги укинат санкциите против кинеските компании и поединци.
Извор: 24vesti.mk
