Според истражувањето на Универзитетот во Њукасл и Тисајд, енергетските пијалоци можат да имаат негативно влијание врз детскиот мозок, бидејќи нивната употреба го зголемува ризикот од ментални проблеми, вклучувајќи нарушување на хиперактивност со дефицит на внимание (АДХД), депресија, анксиозност и самоубиствени мисли.
Конзумирањето енергетски пијалоци има за цел да ја зголеми енергијата со кофеин и други стимуланси.
Во студијата објавена во списанието „Public Health“, научниците ги земале предвид податоците од 57 студии кои опфатиле 1,2 милиони деца и млади луѓе од повеќе од 21 земја кои консумирале енергетски пијалоци.
Британските научници ја спроведоа оваа студија како продолжение на првичното истражување од 2016 година и открија уште понегативни последици по менталното и физичкото здравје на децата предизвикани од консумирањето енергетски пијалоци, изјави главниот автор на студијата, професорката Амелија Лејк од Универзитетот на Тисајд за „Фокс њуз“.
„Ја повторивме студијата само за да најдеме поголеми, јасни докази кои укажуваат дека консумирањето на овие пијалоци е поврзано со негативни здравствени резултати“, додаде таа.
Врз основа на овие наоди, истражувачите и другите британски здравствени организации ја повикаа владата да ја забрани продажбата на енергетски пијалоци на деца под 16-годишна возраст.
Содржината на кофеин во енергетските пијалоци се движи од 50 mg до 505 mg по пијалок.
„Овие докази укажуваат дека енергетските пијалоци немаат место во исхраната на децата и младите“, заклучува Лејк.
Извор: kurir.mk
