Службата за Итна медицинска помош во Скопје се грижи за околу 600 илјади жители. Од 2015-тата, последната година за која има податоци, кубури со бројот на тимови.
Еден тим се состои од доктор, медицинска сестра и возач. Такви тимови, на хартија, имаат вкупно 45, а според владината уредба треба да имаат најмалку 63. Тоа се 18 тима помалку од законскиот минимум.
Статистички, оваа служба има 17 возила, но за итните повици се користат 11.
– Од тие 17 едно е ‘дачија дастер’ кое не е санитетско возило, а сепак е во нашата служба. Имаме два ‘рено трафик’ кои се од 2012 година и имаат поминато над 300 илјади километри и тие не можеме да ги вклучиме на итните покани. Имаме две возила ‘фоклсваген’ кои се од 2008 година и тие исто имаат над 300 илјади и не можеме да ги вклучиме во итни покани затоа што брзината на движење им е помала односно не одат, како што велат возачите, повеќе од 50, кажа неодамна раководителката на Итна медицинска помош – Скопје, Милица Бубало во интервју за ,,360 степени”.
Амбасадорот Дејвид Гир, шеф на Делегацијата на Европската Унија, денеска на Службата за итна помош Скопје ќе и примопредаде седум возила за брза помош финансирани од ЕУ.
Делегацијата на ЕУ, како што соопшти, обезбеди седум амбулантни возила финансирани од ЕУ за Итната помош во Скопје и Здравствениот дом Скопје. Возилата ќе превезуваат болни или повредени лица до болниците во Скопје. Главниот град има најголеми потреби и население во државата и донацијата ќе го ублажи недостигот од возила.
-Ова е најновата испорака на помош од ЕУ наменета да му помогне на здравството во обезбедување подобри услуги за граѓаните. Од 2021 година, Делегацијата на Европската Унија обезбеди системи за магнетна резонанца и за компјутерска томографија во осум болници низ земјата. Преку достигнување на стапка на искористеност на овие уреди како во земјите-членки на ЕУ, оваа медицинска радолошка опрема ќе придонесе за понавремена дијагностика. ЕУ продолжува да го помага здравствениот сектор во подобрување на целокупната здравствена инфраструктура. Проектите финансирани од ЕУ кои го поддржуваат спроведувањето на Стратегијата за здравство 2023-2030 и системот за трансплантација се во тек. Поддршка на програмата за скрининг и превенција на рак, програмата за неонатална грижа и надградбата на апликацијата „Мој термин“ се планирани за финансирање од ЕУ веќе во 2024 година, наведува Делегацијата во најавата за примопредавањето.
Амбасадорот Дејвид Гир, шеф на Делегацијата на Европската Унија, денеска на Службата за итна помош Скопје ќе и примопредаде седум возила за брза помош финансирани од ЕУ.
Извор: skopskoeho.mk
