АНКАРА (АА) – Директорот на Агенцијата за комуникации на Претседателството на Туркије, Фахретин Алтун, вчера изјави дека ќе истраат во откривањето на пропагандните и дезинформациски методи што Израел ги користи за да го рационализира своето дејствување во Појасот Газа, каде што уби повеќе од 26.000 луѓе, известува Анадолу.
„Без обѕир на методите што извршителите ги користеле за да ги скријат своите гнасни дела, ние ќе го свртиме вниманието на светската јавност кон нив“, рече Фахретин Алтун на состанокот во Анкара фокусиран на проценката на достигнувањата на Агенцијата во 2023 година и визијата за 2024.
„Активно се боревме во објавувањето на реалноста на војната во Газа од 7 октомври. Како дел од оваа борба, ја координираме работата на новинарите во регионот и ја информираме националната и меѓународната јавност за израелските злосторства против човештвото“, рече Алтун.
Според неговите зборови, едно од најважните прашања на кои Агенцијата се фокусира е Газа, и ги наброи иницијативите на кои работеле, вклучувајќи ги Самитот „Едно срце за Палестина“, чиј домаќин беше Емине Ердоган, првата дама на Туркије, и изложбата „Bulletproof Dreams“ во Истанбул.
Во објава на социјалната мрежа Х, Алтун рече дека Агенцијата за комуникации продолжува без прекин да работи на креирање на комуникациската стратегија на Туркије, јакнењето на земјата како бренд и продолжување на борбата за вистината против дезинформацијата.
Извор: Anadolu Agency (AA)
