Ѓорѓе Давид се уште е во Македонија, потврдија од кумановското обвинителство. Српскиот пеач и член на жирито на „Ѕвезде Гранда“, е во земјава иако српските медиуми објавија дека е во Белград, една недела по трагичната несреќа во близина на Куманово, кога загина едно лице.
Иако кај Давид не беше утврдена вина, кумановоското обвинителство за српскиот пејач определи мерки на претпазливост и привремено му го одзете пасошот и личната карта.
– Мерките на претпазливост определени спрема странскиот државјанин кој учествуваше во тешката сообраќајна несреќа кај Табановце се уште се на сила. Согласно информациите кои ги има обвинителството до овој момент, тој не ја напуштил државата и утрово се јавил во Судот како што му е определено. Резултатите од наредените вештачења неопходни за да се расчистат причините за сообраќајната несреќа се уште не се пристигнати до обвинителството. – велат од Основното јавно обвинителство Куманово.
Неколку часа по несреќата, основното јавно обвинителство соопшти детали за тоа како настрада сопатничката во возило „фолксваген поло“ со кумановски регистарски таблици.
Според првичната истрага, автоомобилот во кој била сопатник се судрил со „фолксваген голф“ со скопски регистерски ознаки, а како причина се наведува дека најверојатно возачот на едното од возилата влегол на автопат во недозволена насока. По овој судир, сопатничката од возилото со кумановски ознаки излегла од истото по што на неа во тој момент налетало возило марка „Опел инсигниа“ со српски таблици. Од ударот, жената се здобила со тешки телесни повреди од кои починала. Уште две други лица добиле тешки телесни повреди додека едно лице било полесно повредено.
Музичарот кој директно удрил во 49 годишната жена, за српските медиуми изјави дека таа се шетала по автопатот кога се случила несреќата. Веднаш му биле извршени проверки по кои било утврдено дека не бил во алкохолизирана состојба и дека возел во рамки на законски пропишаната брзина.
Извор: 24vesti.mk
