Кривичниот суд им определи мерка притвор од 30 дена на пет лица кои беа уапсени во вчерашната полициска акција во Грчец и на неколку други локации. Едно лице доби мерки за претпазливост, односно му е одземен пасошот.
„Судии на претходна постапка при Основниот кривичен суд Скопје, постапувајќи по предлог на Основното јавно обвинителство за гонење организиран криминал и корупција за определување мерки за обезбедување присуство за 6 лица, кои во текот на ноќта беа спроведени во судот, а поврзани со полициската акција во с. Грчец, донесоа решенија, со кои: прифатен е предлогот на ОЈО за организиран криминал и корупција и на Ш. Б., Ф. Б., Н. И., Ф. С. и С. А. им определи мерка притвор во траење од 30 дена, за О. П. го прифати предлогот за определување мерки за претпазливост, односно одземање патна исправа и забрана за издавање нова, забрана за напуштање живеалиште и oбврска за јавување во суд“.
Судот го прифати предлогот и определи мерка притвор за 10 лица кои се опфатени со истрагата, а во моментов не се достапни на органите за прогон и тоа од нивно пронаоѓање, односно лишување од слобода. Во полициската акција беа извршени претреси на 20 локации во Грчец и други места, а запленети биле голема количина пари, луксузни автомобили и други предмети. Од МВР соопштија дека била разбиена меѓународна организирана криминална група чии членови биле инволвирани во организираше набавка на кокаин од земји од Јужна Америка, а осомничени се и за убиства извршени на територијата на Македонија. Осомничените 16 припадници на групата се на возраст од 20 до 50 години. Од нив во земјава се приведени шестмина, едно лице од претходно веќе е приведено во Шпанија, а дел од осомничени веќе подолг период се надвор од земјата. Сите биле членови на меѓународна организирана криминална група, а ги предводел Ш.М. Од Грчец. Министерот Оливер Спасовски за Трилинг вели дека има многу податоци и утврдени се лица од институциите на државата кои биле соработници на криминалните активности.
Акција во Грчец имаше во март 2021 година, кога тогашната шефица на Јавното обвинителство за гонење на организиран криминал и корупција Вилма Рускоска се пожали дека акцијата била пробиена. Таму каде што имавме сознанија каде се чува дрогата беше сѐ исчистено, така што полицијата и инспекторите не успеаја да пронајдат поголема количина дрога, рече тогаш Русковска.
Извор: 24vesti.mk
