Граѓаните добија градски превоз, партиите со меѓусебни обвинувања

Градскиот автобуски превозник ЈСП од денеска сообраќа редовно на сите линии низ Скопје. Граѓаните добија јавен градски превоз по вториот успешен обид за гласање на субвенциите за исплата на плати на вработените во јавното сообраќајно претпријатие.

Вчера повеќе од осум часа автобусите останаа паркирани поради штрајкот на вработените во ЈСП кои бараа исплата на декемвриската плата.

Паркирани беа и автобусите на приватните превозници кои решија да ги поддржат колегите во одлуката и тие да стапат во штрајк бидејќи како што велат и нив ги засега оваа субвенција.

Граѓаните се снаоѓаа со сопствен превоз да стигнат до своите дестинации, па поради сголемениот сообраќаен метеж тешко се доаѓаше и до паркинг место.