МОСКВА (АА) – Портпаролот на Кремљ, Дмитриј Песков, денес потврди дека во тек се подготовките за посетата на рускиот претседател Владимир Путин на Туркије, јавува Анадолу.
Говорејќи на прес-конференција во Москва, Песков рече дека датумите на посетата ќе бидат објавени „во догледно време, штом претседателите ги финализираат“.
Минатата недела турските медиуми објавија дека Путин ќе се сретне со турскиот претседател Реџеп Таип Ердоган на 12 февруари во Туркије, без да дадат никакви дополнителни информации.
Претходно денес руското Министерство за надворешни работи соопшти дека шефовите на руската и турската дипломатија разговарале за распоредот на билатералните контакти за време на состанокот во Њујорк вчера.
Во врска со видеото објавено од американската Централна разузнавачка агенција (ЦИА) на социјалната мрежа X, во кое се повикуваат Русите да соработуваат, Песков рече: „Ова е всушност прилично вообичаена практика. Разузнавачките агенции низ светот многу често ги користат медиумите и социјалните мрежи за да регрутираат нови вработени.“
„Некој треба да ја извести ЦИА дека ВК (руската социјална мрежа) е многу попопуларна во Русија од забранетата Х, а публиката на ВК е многу поголема“, рече тој.
Извор: Anadolu Agency (AA)
