Во Струга поскапеа сметките за вода. За граѓаните тие се повисоки за 35 отсто, а за фирмите за дури 57. Исто така цената за прифаќање и отстранување фекална вода за домаќинствата се зголеми за дури 80%, а за фирмите за 90. За ваквата одлука гласале советниците од СДСМ и ДУИ. Граѓаните се револтирани. Велат дека ова е уште еден удар врз нивниот џеб и се сомневаат оти всушност плаќаат за партиски вработувања во комуналното претпријатие.
„Не е убаво. Не е за мене зошто јас живеам во странство. Ама за овие што живеат овде со овие мали плати не е добро. Не е само водата што ја поскапуваат, на сите страни нема контрола…“, оценуваат граѓаните.
„…Кој ги прашува граѓаните, се знае – никој ништо. Кој како сака така си прави. Премногу е за овие денешни услови, премногу е, тоа е многу…“, додаваат тие.
„Струга тоа да го прави. Разбирам тоа да го прави Берово, каде нема вода, но Струга не знам. Со тоа ние финансираме партиски вработувања, со цената на водата, ѓубрарината…“
„Јас живеам во Швајцарија, но овде нема алтернатива цените да бидат намалени. Секогаш кога доаѓам, цените само се зголемуват. Не знам како живее овој народ овде…“, вели еден гостин од Швајцарија.
„Јас живеам во Радолишта. Саат и броила имаме, а тие ни пуштаат паушални сметки по 700 денари. Има луѓе кои само две недели ја користат водата во Радолишта, кога доаѓаат на одмор, а тие земаат секој месец по 700 односно 675 денари“, реагираат граѓаните.
А, иако цените се зголемуваат, подобри услуги за граѓаните нема, реагираат од Алијанса за Албанците.
„Има екстремна амортизација на водоводната и канализациската мрежа. Сè уште во некои делови има азбестни цементни цевки. Водоводната мрежа често има проблеми во работењето. Цели населби немаат вода и има проблеми со чистотата и квалитетот на водата“, велат од Алијанса за Албанците.
Директорот на Јавното водоводно претпријатието, Дашмир Насуфи, вели дека цената на водата не ја определува општината, туку Регулаторната комисија врз основа на податоците и трошоците што ги доставила локалната власт. Инаку и покрај повисоките цени на сметките, претпријатието постојно трупа долгови. Во моментов долгот изнесува 3 милиони евра.
Мики Трајковски
Извор: alsat.mk
