Следната мета на Русија ќе биде Европа, ако Украина падне и признае пораз, Руската Федерација ќе ги покаже империјалистичките амбиции кон европските држави, предупреди денеска претседателот на здружението на Украинците „Лесја Украинка“, Александар Урбанович.
Војната во Украина се уште не стивнува, цели на руските напади се дури и породилишта, вели Урбанович и нагласува дека дел од украинците немаат ниту вода за пиење.
Украина скоро две години војува со Русија, откако на 24 февруари 2022 година започна руската инвазија во која досега се загинати десетици илјади украинци. Свесни дека и луѓето во Македонија имаат проблеми, не очекуваат голема хуманитарна помош но потсетуваат дека луѓето во Украина се уште имаат потреба од основните прехрамбени и хигиенски продукти.
Здружението на Украинците „Лесја Украинка“ денес одржа свечен марш во центарот на Скопје, по повод Денот на соборноста на Украина. Маршот се одвиваше од споменикот „Александар Македонски“ на плоштадот „Македонија“ до споменикот на „Тарас Шевченко“ во паркот „Жена Борец“.
Денот на Соборноста, по повод прогласувањето на Актот за обединување на Украинската Народна Република и Западноукраинската Народна Република во 1919 година, во Украина се одбележува секоја година на 22 јануари.
Извор: 24vesti.mk
