При превртување на автобус во Туркије загинаа девет лица, 30 се повредени

МЕРСИН (АА) – Девет лица загинаа, а 30 се повредени, од кои 13 потешко, денес во областа Ајдинџик во јужната турска област Мерсин, јавува Анадолу.

Меѓуградскиот патнички автобус, кој се движел кон југоисточната област Мардин од Мармарис во Западна Мугла, удрил во банкината на излезот од тунелот Саријар во областа Јеникаш и се превртил.

По несреќата, на местото на настанот веднаш се пратени екипи на итна помош, како и екипи за пребарување и спасување и противпожарна бригада.

Со возила на брза помош повредените се пренесени во болниците.

Подоцна гувернерот на Мерсин, Али Хамза Пехливан, изјави дека несреќата се случила околу 01:15 часот по локално време, на релација Мерсин-Анталија.

„Посакувам божја милост за нашите загинати граѓани и сочувство до нивните семејства. Посакувам брзо закрепнување на нашите повредени граѓани“, рече гувернерот.

Пехливан, исто така, за Анадолу изјави дека 13 од повредените се во тешка состојба.

Наведувајќи дека истрагата за несреќата продолжува, гувернерот рече дека возачот „изгубил контрола на излезот од тунелот поради поројните дождови и влажниот коловоз“, додавајќи дека јавен обвинител ја истражува несреќата.

Тој додаде дека сообраќајот меѓу Анталија и Мерсин е отворен во двата правца.

Несреќата ја снимиле камерите на автопатот. На видеото се гледа како автобусот со голема брзина влегува во кривина, удира во банкината и паѓа во каналот.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS). За целосната содржина на вестите ве молиме контактирајте нè за претплата.