Евроинтеграциите се национална амбиција, а не партиска работа. Ова е пораката на ирскиот премиер Лео Варадкар, денеска од Скопје. Посочи дека политичката состојба во земјава треба да остане стабилна, а во исто време изрази надеж дека процесот на преговори со Европската Унија ќе се забрза и од двете страни.
Според Варадкар 10 години од последното проширување на Унијата е долг временски период и време е да се отворот портите за нови членки во европското семејство.
За премиерот Ковачевски, сите алтернативи наспроти членството во ЕУ се утопии кои не можат да дадат ниту приближен резултат на она што го дава членството во Унијата. Порача дека не постои сила во земјава, која може да го запре процесот на евроинтеграции.
Ковачевски и Варадкар денеска немале детални разговори за корупцијата во земјава. Ирскиот премиер порача дека битката против корупцијата е постојана и нема да заврши кога Македонија ќе се приклучи на ЕУ. Порача и дека Ирска е подгтвена да и помогне на Македонија во реформскиот процес.
Премиерот Ковачевски пак се наврати дека токму за време на ирското претседателство со ЕУ, во 2004 година, Макеоднија ја поднесе апликацијата за членство во ЕУ и оттогаш добива континуирана поддршка од Даблин.
Варадкар е во посета на Македонија како дел од дипломатската турнеја во трите земји кандидати за членство во ЕУ од регионот. Пред да пристигне во Скопје, ги посети и Црна Гора и Косово.
Извор: 24vesti.mk
