Американскиот државен секретар Ентони Блинкен денеска во Истанбул се сретна со турскиот претседател Реџеп Таип Ердоган. Како што пренесуваат светските медиуми, војната во Газа била една од главните теми на разговор, а Блинкен ја потенцирал потребата од спречување на ширење на конфликтот, обезбедувањето хуманитарна помош и ослободувањето на заложниците.
Покрај Газа, двајцата разговарале за последните чекори за завршување на ратификацијата на шведската кандидатура за членство во НАТО од страна на Анкара, како и за предвидената американска продажба на борбени авиони Ф-16 на Турција, објавија турските медиуми.
Според агендата, Блинкен заминува на Блискиот Исток, негова четврта турнеја во регионот во последните три месеци. Се очекува тој да ги посети Јордан, Катар, Обединетите Арапски Емирати, Саудиска Арабија како и Израел, Западниот Брег и Египет.
За време на турнејата, Блинкен се обидува да разговара за конкретни чекори за тоа како актерите во регионот би можеле да го искористат своето влијание, за да избегнат ескалација на војната во Газа, соопштија од неговиот кабинет.
Извор: 360stepeni.mk
