Нема притвор за Незири и насилниците, не била само кавга меѓу колеги, нарушена била безбедноста на аеродромот

По неколку часа поминати на распит во полициска станица во Автокоманда, Беким Незири доцна синоќа беше изведен пред судија на претходна постапка. Со полициска придружба и лисици на рацете нешто по 19 часот беше спроведен во Кривичниот суд.

Таму, се задржа неколку часа. Веднаш откако Незири, но и другите три лица беа спроведени во судот, се огласи и Јавното обвинителство. Наспроти тврдењата на директорот на М-НАВ, Фахрудин Хамиди дека тоа било кошкање помеѓу колеги, обвинителството вели дека со нивните постапки овие лица ја загрозиле безбедноста на авиособраќајот.

„Осомничените на 4 јануари, со заедничко дејствие на извршување, сториле кривично дело со кое ја загрозиле безбедноста на Меѓународниот аеродром Скопје, незаконски и со намера да извршат дело на насилство против лице ги попречиле услугите на аеродромот. Со нивните дејствија тие ја загрозиле безбедноста на меѓународниот воздушен сообраќај во момент кога во воздушниот простор над државава се одвивале 28 летови под контрола на М-НАВ, со што се осомничени дека извршиле кривично дело за кое е предвидена казна затвор од најмалку пет години.“, соопштија од Јавното обвинителство.

Јавниот обвинител, ценејќи дека во конкретниот случај постои опасност од бегство, но и можност осомничените да влијаат врз постапката или да го повторат делото, до судијата на претходна постапка доставило предлог за определување мерка притвор за сите четворица кои биле приведени. Сепак, судот не го уважи барањето на Обвинителството, па наместо притвор им определи мерки на претпазливост. Што тоа значи? Осомничените ќе останат без патните исправи и нема да смеат да го напуштат живеалиштето, односно територијата на Скопје. Обвинителството најави дека ќе се жали на одлуката на судијата на претходна постапка.

Според соопштението на Обвинителството, може да се заклучи дека инцидентот не било само мало кошкање помеѓу колеги кои се знаат 20 години, како што тврдеше вчера директорот на М-НАВ, Фахрудин Хамиди.

„Се случил еден немил настан, дефинитивно и тоа не смеело да се случи. Но, се работи за конфликт помеѓу колеги кои се знаат 20 години, оделе на школување заедно.“, рече Хамиди.

-Ама осум луѓе влегле таму, надворешни лица директоре. Дали секој може да влезе.
-Кој треба да поднесе одговорност?

„Поради фактот дека органите, повисоко од мене, се бават со таа работа, во интерес на итрагата, има камери таму, има многу работи, истрагата нека си тече“, рече Хамиди.

Дека не било само конфликт помеѓу колеги покажува и фактот што други четири лица се сеуште недостапни за органите на прогонот, односно се во бегство. Овие лица не биле вработени во М-НАВ, но успеале да поминат покрај обезбедувањето. За, тоа според неофицијални информации, им помогнал Беким Незири.

Синдикатот на М-НАВ најави дека ќе стапат во целосен штрајк доколку директорите не бидат разрешени, а насилниците уапсени. Воедно владата најави дека на седница на 9–ти јануари ќе го разреши целиот Управен одбор на М-НАВ.