ЈАР го тужи Израел: „Тие се виновни за геноцид“

Од Меѓународниот суд на правдата, со седиште во Хаг, Холандија, се бара да донесе времена мерка со која ќе му се наложи на Израел да ги запре своите воени операции во Газа

Јужноафриканската Република денеска поднесе тужба против Израел пред Меѓународниот суд на правдата, највисокото правосудно тело на Обединетите нации, за, како што се наведува, геноцид врз Палестинците во Газа и побара од институцијата да ѝ нареди на еврејската држава да престане со нападите.

Во поднесокот на Јужна Африка се тврди дека „израелските дејства по својата природа се геноцидни“, имајќи предвид дека тие биле преземени со намера „да се уништат Палестинците во Газа како дел од пошироката палестинска национална, расна и етничка група“.

Од Меѓународниот суд на правдата, со седиште во Хаг, Холандија, се бара да донесе времена мерка со која ќе му се наложи на Израел да ги запре своите воени операции во Газа.

Јужна Африка може да ја иницира оваа постапка врз основа на Конвенцијата за геноцид, бидејќи и Израел и Јужна Африка се потписници на таа конвенција.

Тужбата е последниот потег на Јужна Африка, која е многу критична за војната на Израел во Газа. Минатиот месец, пратениците на ЈАР гласаа за затворање на израелската амбасада во Преторија и за суспендирање на сите дипломатски односи додека не се договори прекин на огнот во израелската војна против исламистичката група Хамас во Газа.

Израел го отфрли поднесувањето на случајот за геноцид од Јужна Африка пред Меѓународниот суд на правдата како бесмислена клевета без правна основа и рече дека го почитува меѓународното право во војната против Хамас во Газа.

„Јужноафриканската Република соработува со терористичка група која повикува на уништување на Израел. Населението во Газа не е непријател на Израел, а Израел се обидува да не им наштети на цивилите“,

се вели во соопштението.