Тој изјави дека бомбардирањето на бегалскиот камп Магази е едно од најсмртоносните, додавајќи дека е регистрирано раселување на уште 150 илјади луѓе
Високиот претставник на Европската Унија за надворешна политика и безбедност Жозеп Борел, денеска изјави дека е неопходен итен прекин на огнот во Појасот Газа.
„Израелската копнена офанзива во центарот на Газа продолжува да резултира со големи жртви и покрај обврската на израелската армија да ги заштити цивилите“,
напиша Борел на социјалната мрежа Х.
Тој изјави дека бомбардирањето на бегалскиот камп Магази е едно од најсмртоносните, додавајќи дека е регистрирано раселување на уште 150 илјади луѓе.
Израел начелно се согласи да му дозволи на Кипар да отвори поморски коридор меѓу тој остров и Појасот Газа, палестинска територија под израелска блокада, каде што хуманитарните потреби се огромни, потврди денеска израелското министерство за надворешни работи.
Кипар го предложи коридорот по избувнувањето на војната меѓу Израел и Хамас, палестинското исламистичко движење на власт во Појасот Газа.
Според ОН, хуманитарната ситуација во Газа е катастрофална, околу 1,9 милиони луѓе или 85 отсто од населението морале да ги напуштат своите домови. Сериозен недостиг од најосновните производи има на таа територија, која е под целосна израелска блокада од 9 октомври, два дена по почетокот на конфликтот меѓу Израел и палестинскиот Хамас.
Засега хуманитарната помош се доставува во недоволно количество, по копно, преку преминот Рафах меѓу Појасот Газа и Египет.
Извор: 360stepeni.mk
