БЕЛГРАД (АА) – Изборната листа на актуелниот српски претседател Александар Вучиќ води на парламентарните избори што се одржаа вчера, јавува Анадолу.
Изборната листа „Александар Вучиќ – Србија не смее да застане“ води на изборите за Народното собрание на Србија со 46,85 отсто освоени гласови врз основа на обработени 7.846 избирачки места од вкупно 8.273.
Втора по процентот на освоени гласови е опозициската Изборна листа „Србија против насилството“ со досега освоени 23,37 отсто, а трета е „Ивица Дачиќ – премиер на Србија“ со 6,59 отсто. Изборниот праг што изнесува три отсто досега го поминаа и листите: „Надеж за Србија“ со 5,02 отсто и „Ние – гласот на народот“ со 4,68 отсто.
Од вкупно 18 изборни листи, на парламентарните избори во Србија учествуваа седум листи на националните малцинства. Според српските закони, изборниот праг од три проценти за влез во Народното собрание на Србија не важи за листите на националните малцинства.
Така, листата на Сојузот на војводинските Унгарци освои 1,72 отсто, листата на Усама Зукорлиќ „Обединети за правда“ – Демократскиот сојуз на Хрватите на Томислав Жигманов во Војводина – 0,78 отсто, СДА Санџак – д-р Сулејман Угљанин – 0,6 отсто, листата Политичката борба на Албанците продолжува – Шаип Камбери – 0,38 отсто, листа на Руската партија – Слободан Николиќ – 0,3 отсто и Албанската демократска алтернатива – 0,09 отсто.
На парламентарните, покраинските и изборите за советници во 65 локални самоуправи, кои се одржаа вчера во Србија, излезноста на гласачите беше нешто повеќе од 58 отсто. Право на глас имаа 6.500.666 гласачи. Граѓаните на републичко ниво можеа да избираат меѓу 18 листи.
