БЕЛГРАД (АА) – Во Република Србија утре, 17 декември, ќе се одржат вонредни парламентарни избори, вонредни избори за Собранието на Автономна Покраина Војводина, вонредни локални избори за главниот град Белград и уште 65 локални самоуправи, известува Анадолу.
На парламентарните избори во Србија право на глас имаат 6.500.165 граѓани, на покраинските во Војводина 1.669.734, а на изборите во Белград 1.613.190, соопшти Републичката изборна комисија (РИК).
Гласачките места се отвораат во 7, а се затвораат во 20 часот. Доколку некој се затекне на гласачко место за време на затворање на гласачкото место или непосредно пред тоа, ќе му биде дозволено да гласа.
Република Србија, според важечкиот Изборен закон, претставува една изборна единица. Пратеничките мандати се распоредуваат пропорционално според бројот на освоени гласови. Во распределбата на мандатите за политичките партии од националните малцинства, доколку не го преминат изборниот цензус од 3%, важи „природен праг“, кој се добија кога бројката на важечки гласови ќе се подели со 250 пратеници за секое пратеничко место, што во зависност од излезноста на изборите, се движи меѓу 12.000 и 16.000 гласови. На овие избори учествуваат 7 изборни листи на националните малцинства.
Вонредните избори во Србија се распишани на барање на дел од опозициските партии, по повеќемесечни протести на граѓаните ширум Србија, незадоволни од одговорот на државата на двете масовни убиства во почетокот на мај во Белград и во околината на Младеновац, во кои настрадаа 19 луѓе, воглавно деца.
