Грета Гервиг, чиј последен филм „Барби“ оваа година заработи 1,4 милијарди долари од кинобилети и доби девет номинации за Златен глобус, ќе претседава со жирито на Канскиот филмски фестивал во 2024.
Гервиг досега присуствуваше во Кан заедно со нејзиниот партнер Ноа Баумбах, особено во 2017 кога беше премиерно прикажан неговиот „Приказните на Мејеровиц“, но таа никогаш немала свој филм на фестивалот. Имаше разговори да се донесе „Барби“ во Кан годинава, но тајмингот не функционираше. Филмот на „Варнер Брос“ имаше премиера на 19 јули и стана инстант класик и филм со најголема заработка во светот на годината. Покрај водечките номинации за Златен глобус, „Барби“ се очекува да добие и бројни номинации за Оскар.
„Сакам филмови – сакам да ги снимам, сакам да ги гледам, сакам да зборувам за нив. Како синефил, за мене Кан отсекогаш бил врвот на она што може да биде универзалниот јазик на филмовите“, изјави Гервиг.
Гервиг е првата американска режисерка која ќе биде претседателка на жирито на Канскиот филмски фестивал. На 40-годишна возраст, таа е и најмладата личност што ја презема функцијата по Софија Лорен, која имаше 31 година кога претседаваше со жирито на Кан во 1966. Други значајни претседателки на жирито се Џејн Кемпион во 2014 и Оливија де Хевиленд, првата претседателка на жирито во Кан, во 1965.
Почнувајќи како актерка, Грета Гервиг се проби како режисерка со „Лејди Бирд“ во 2017. Таа стана петтата жена номинирана за најдобар режисер и филмот освои вкупно пет номинации за Оскар. Нејзиниот следен филм, „Малите жени“, исто така беше хит и беше номиниран за пет Оскари, освојувајќи за најдобра костимографија. Со „Барби“, Гервиг стана режисерка чиј филм заработил најмногу во историјата.
ИЗВОР: sdk.mk
