ГАЗА (АА) – Со стапувањето на сила на хуманитарната пауза во конфликтот меѓу Хамас и Израел утринава, илјадници Палестинци, кои беа раселени по неколкунеделните израелски напади на Појасот Газа, почнаа да се враќаат во своите домови за да го проверат својот имот и да ги побараат членовите на семејството, јавува Анадолу.
Репортер на Анадолу јавува дека многу Палестинци ги напуштиле училиштата каде што барале засолниште од израелските напади што траеја од 7 октомври до стапувањето на сила на четиридневната хуманитарна пауза утринава за размена на затвореници и праќање помош во блокираниот Појас Газа.
По жестоките израелски напади многу Палестинци во густо населениот Појас Газа изгубија контакт со членовите на семејството поради постојаните прекини во комуникацијата и ограниченото движење.
Израелската армија утринава фрли летоци на јужниот дел на Појасот Газа со предупредување до Палестинците да не се преселуваат во северниот дел на Појасот бидејќи тој сѐ уште е воена зона.
Четиридневното хуманитарно примирје меѓу израелската армија и Хамас стапи на сила утринава во сите области на Појасот Газа, со што привремено беа запрени нападите за размена на затвореници и испорака на помош.
