Публиката во камерната сала на Филхармонија синоќа на нозе и со стоечки овации ги испрати гитарскиот вуртуоз Мухамед Ибрахими, Агни Авшар, Ратко Даутовски и Бобан Мирковски.
И мене не ми се оди, рече Ибрахими додека ја напушташе сцената.
И публиката не сакаше да си оди, а Авшар заблагодарувајќи се рече дека не се навикнати на толкав аплауз.
Мухамед Ибрахими е скромен, но маестрален на сцена. Го нарекуваат скриен гитарски бисер, а за секој негов концерт секогаш се бара место повеќе. Тој својата гитара (мандолина, саз итн.) ја третира на многу неконвенционален начин, доста интуитивен и инспиративен. Неговите композиции се автентична мешавина на повеќе музички стилови, како блуз, рок или амбиентален, но длабоко вкоренети во ориенталната (суфи) традиција и балканскиот фолклор. Овие храбри и елегантни комбинации честопати даваат неочекувани резултати среде уникатен и прекрасен звучен пејзаж. Исклучително импресивно за гледање/слушање во живо.
Синоќа, заедно со своите колеги изведоа дванаесет композиции од неговите два албума и приреди прекрасно музичко патување за публиката во повеќе музички правци од рок, класика, џез, па се до поп со етно елементи.
Инаку, Мухамед Ибрахими го паметиме како гитарист на групата БЛА БЛА БЛА, а многумина го познаваат и како творец кој практикува соработки со различни уметници. За себе вели дека е самоук, дека свири од својата 5 година на различни инструменти, но ако треба да бира, би ја одбрал гитарата. Има издадено два албума, Fly во 2014 и Devotion во 2019 година. Ова ќе биде втор негов солистички концерт оваа година, а веќе за следната година се подготвува нов материјал и нови соработки.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
ИЗВОР: republika.mk
