Случајот ТНТ утре на Апелација – Цаноски: Судијата Ристов ги слуша наредбите на Груевски за делото да застари

Екс премиерот Никола Груевски е директно поврзан со низата малверзации што се прават со случајот ТНТ за уривањето на објектот Космос, за делата за него, како и на екс министерот за транспорт Миле Јанакиески да застарат, обвинува Фијат Цаноски првиот човек на компанијата ФИНЕ. Ова, како што објаснува Цаноски, го прави преку судијата Ѓоко Ристов кој е се уште близок со Груевски. За утре Ристов свикал јавна седница на која воопшто не е испратена покана до Цаноски, а на која вели, очекува да донесе одлука за застарување на предметот, според измените на Кривичниот законик.

„Тој ја свикува јавната седница и немаме право никој на дискусија и ако сме странки, тој само заклучува дека по стапување на член 353 од Кривичниот законик нема повеќе потреба за никаква дискусија и расправија и делото застарува. Тој има интерес да се спаси Никола Груевски, според мене, мое мислење тој е играчот кој што командува“, вели Фијат Цаноски.

Случајот ТНТ имаше првостепена пресуда во мај минатата година кога Груевски доби затворска казна од 9, а Јанакиевски 4 години. Осудени беа и екс градоначалникот на Гази Баба Тони Трајковски и Елисавета Најдовска тогашен градежен инспектор. Во мај годинава е одржана јавна седница на Апелациониот суд по која за 60 дена по што судијата Ристов имал законски рок од 8 мај до 8 јули да ја донесе пресудата, но и покрај тоа тој и понатаму го одолговлекувал предметот.

Цаноски верува дека и да не беа измените во Кривичниот законик Ристов ќе продолжел со неговото одолговлекување се до застарување. Најави дека претставки ќе поднесе до сите институции а можно е против судијата да поднесе и тужба.

„Ќе се обратиме до сите институции во државата, правни, до сите амбасади и меѓународни институции. И на крај кривичната пријава што ќе ја поднесеме понатаму за Ѓоко Ристов за злоупотреба на службената должност , точно тој фамозен член кој што е променет, за него не е променет и важи, ќе бараме, направил штета лично тој на мојата фирма ФИНЕ ќе ја бараме штетата лично од него, да ги исплати 11 милиони и 200 илјади евра“, додаде Фијат Цаноски.

Случајот ТНТ беше поднесен и во судот во Стразбур во 2013 кој првично ја прифати, но потоа во 2017 откако се формира СЈО и го презеде случајот, им беше речено дека правните можности за овој случај се уште не се исцрпени во Македонија и дека не можат тие да постапуваат се додека не се завршат сите судски инстанци.