МОСКВА (АА) – Во главниот казахстански град Астана денес започна 10. самит на Организацијата на туркиски земји (ОТС), јавува Анадолу.
Како што соопштија од Кабинетот на казахстанскиот претседател Касим-Жомарт Токаев, на настанот присуствуваат и лидерите на Туркије, Азербејџан, Унгарија, Киргистан, Туркменистан и Узбекистан.
Самитот започна со состанок на Советот на министрите за надворешни работи на таа група, на кој шефот на дипломатијата на Казахстан, Мурат Нуртлеу, изрази загриженост за ситуацијата во Појасот Газа и повика на отворање хуманитарни коридори.
„Нашата земја е многу загрижена поради ескалацијата на насилството на Блискиот Исток. Ние се приклучуваме на соработката со меѓународната заедница и повикуваме на итен прекин на огнот. Отворањето хуманитарни коридори за жителите на Газа е приоритетна задача на казахстанската дипломатија“, нагласи тој.
Министерот за надворешни работи на Казахстан ги повика двете страни да се фокусираат на мировните преговори.
Лидерите на земјите членки на Организацијата на туркиските земји, исто така, се состанаа во рамките на Самитот.
Организацијата на туркиски земји, порано наречена Туркиски совет, е основана во 2009 година како меѓувладина организација составена од истакнати независни туркиски земји што работат заедно да ги зајакнат меѓусебните односи.
Нејзини членки се Туркије, Азербејџан, Казахстан, Киргистан и Узбекистан, додека Унгарија, Туркменистан и Турската Република Северен Кипар имаат статус на набљудувачи.
