ЊУЈОРК (АА) – Вчера во Њујорк, Соединетите Американски Држави (САД) беше отворено второто издание на „Istanbul Photo Awards 2023“, меѓународен натпревар за фотографии организиран од страна на Анадолу.
Изложбата ќе трае до 8 ноември во „Блу Галери“.
На изложбата присуствуваа претседателот и извршен директор на Анадолу, Сердар Караѓоз, комесарот за меѓународни прашања на Њујорк, Едвард Мермелштајн и турскиот генерален конзул во Њујорк, Рејхан Озѓур, како и странски претставници, претставници на академската фела и истакнати личности од светот на фотографијата.
Меѓу присутните на изложбата беа и Арон Џексон, менаџер на дескот за фотографии во седиштето на „Асошиетед прес“ во Њујорк, и наградуваниот фотограф Ален Шредер, од претходните изданија на натпреварот.
Организирана со поддршка од „Никон Туркије“, Турската агенција за соработка и координација (ТИКА) и „Туркиш ерлајнс“, на изложбата се прикажани дела на 29 фотографи што добија награди на деветтото издание на натпреварот.
Покрај тоа, на изложбата се прикажани и претходно наградувани фотографии што ја истакнуваат темата за Палестина.
Посетителите на изложбата имаа можност да видат разновидна низа фотографии, почнувајќи од војната Украина-Русија до настаните во Палестина, трговијата со деца во Нигерија, еколошките промени предизвикани од литиумот, студиите за дивиот свет во Тајланд, Светското првенство во Катар, борбите со бикови во Португалија, мразокршачите на Aрктикот и албиносите на африканскиот континент, обезбедувајќи сеопфатен преглед на глобалните настани во изминатата година.
Вкупно 29 фотографи добија награди во 10 категории на годинашниот натпревар. Главната награда „Фотографија на годината“ му припадна на Сергеј Козлов, фотограф од Европската агенција пресфото (ЕПА), за неговата фотографија насловена „Војна Украина-Русија“, беше наградена од меѓународното жири.
– „Моќта на фотографијата“ –
На отворањето на изложбата, претседателот и извршен директор на Анадолу, Сердар Караѓоз рече дека изложените 165 фотографии претставуваат „овековечена верзија на секој момент“.
Тој нагласи дека Анадолу „отсекогаш верувала во моќта на фотографијата од нејзиното основање, препознавајќи ја фотографијата како значајна компонента на вестите“.
„Во својата деветта година нашиот натпревар еволуираше во глобална платформа со 16.000 регистрирани фотографи, со што се смета за еден од најценетите натпревари за новинарска фотографија на меѓународно ниво“, рече Караѓоз.
Тој додаде дека на натпреварот учествуваат фотографи од целиот свет, кои презентираат единечни и сериски фотографии во категории, како што се вести, спорт, животна средина, портрети и секојдневен живот.
„Следната изложба ќе се одржи во Лондон во текот на наредните денови“, рече Караѓоз.
Комесарот за меѓународни прашања на Њујорк, Едвард Мермелштајн, упати честитки до организаторите, учесниците и победниците на натпреварот. Тој рече дека изложбата е значајна форма на уметност во расветлувањето на клучните прашања.
Мермелштајн рече дека натпреварот за фотографии на Анадолу игра клучна улога во раскажувањето важни приказни од светот и поттикнувањето подлабоко меѓукултурно разбирање.
Турскиот генерален конзул во Њујорк ја истакна значајната цел на натпреварот и изложбата, нагласувајќи дека „фотографиите се врежани во историјата“.
Тој рече дека „со текот на годините Анадолу со право ја заслужила својата единствена позиција меѓу глобалните новински агенции“, додавајќи дека агенцијата еволуирала во бренд, одржувајќи ги доверливоста и кредибилитетот како извор на вести.
За повеќе информации за натпреварот, кој наскоро ќе започне со прифаќање апликации за 2024 година и за да ги видите победничките фотографии, посетете ја https://www.istanbulphotoawards.com/.
