ИСТАНБУЛ (АА) – Генералниот секретар на Обединетите нации (ОН), Антонио Гутереш, за време на денешната посета на регионот на Хималаите во Непал, го повика светот да го „запре лудилото“ поврзано со климатските промени, јавува Анадолу.
„Мора да се погрижиме да го ограничиме порастот на температурата на 1,5 степени. Глечерите се повлекуваат, ние не може да се повлечеме. Мора да продолжиме со климатските активности“, рече тој.
Тој изјави дека во подножјето на Монт Еверест лично го видел страшното влијание на климатската криза на Хималаите.
Гутереш од неделата престојува во четиридневна посета на Непал на покана на премиерот Пушпа Камал Дахал.
Тој се состана со Дахал и други високи владини претставници, вклучително и министрите за надворешни работи и за одбрана.
На заедничката прес-конференција со непалскиот премиер, Гутереш ги повика развиените земји да ја зголемат поддршката за Непал и другите земји што страдаат од последиците од климатските промени.
„Непал е погоден од бура од глобални кризи што не ги создаде: последиците од пандемијата КОВИД-19, инфлацијата и огромната закана од климатскиот хаос“, рече генералниот секретар на ОН.
Ова е прва посета на генералниот секретар на ОН на Непал по преземањето на функцијата на 1 јануари 2017 година.
