РАМАЛА (АА) – Израелската војска денес продолжи со своите немилосрдни напади врз Појасот Газа по речиси целосниот прекин на телекомуникациските и интернет мрежите, јавува Анадолу.
Репортерите на Анадолу кои се на терен јавија дека бомбардирањето главно е концентрирано во близина на болницата Ал-Шифа и Индонезиската болница.
Интернетот и комуникациите беа прекинати откако израелската војска соопшти дека го интензивира бомбардирањето на Газа и дека нејзините копнени сили ги „прошируваат операциите“. Меѓународните хуманитарни агенции рекоа дека не биле во можност да контактираат со своите вработени.
Лин Хестингс, координаторката на ОН за Палестина, рече: „Газа го загуби контактот со надворешниот свет“.
„Пресечени телефонски линии, интернет, мобилни мрежи. Болниците и хуманитарните операции не можат да продолжат без комуникации, енергија, храна, вода, лекови. Безбедноста на цивилите, вклучително и на здравствените работници, персоналот на ОН, е под сериозен ризик. Војните имаат правила. Цивилите мора да бидат заштитени“, истакна таа на платформата X.
„Палестинските цивили се веќе под опсада во окупираниот Појас Газа, а сега се и под целосен прекин на комуникациите“, рече Ерика Гевара-Росас, виша директорка за истражување, застапување, политика и кампањи во Амнести интернешнал.
„Го повикуваме Израел веднаш да стави крај на неселективните и непропорционални напади кои веќе убија и повредија толку многу цивили, од кои над 3.000 деца. Интернетот и телекомуникациската инфраструктура, исто така, мора итно да се обноват, за да се овозможат спасувачките операции поради израелските воздушни напади и проширувањето на копнените операции“.
Конфликтот започна на 7 октомври кога палестинската група Хамас ја почна операцијата „Поплава Ал Акса“ – ненадеен повеќестран напад со бараж ракети и инфилтрирање во Израел преку копно, море и воздух. Хамас истакна дека операцијата е одмазда за упадите во џамијата Ал Акса и зголеменото насилство од страна на еврејските доселеници врз Палестинците.
Израелската војска потоа започна немилосрдно бомбардирање на позиции на Хамас во Појасот Газа. Кампањата се интензивира синоќа, откако војската соопшти дека ги проширува операциите на воздушните и копнените операции на територијата. Исто така, го прекина интернетот и комуникациите во енклавата под опсада.
Најмалку 7.326 Палестинци загинаа во израелските напади. Според официјалните податоци, околу 70 отсто од палестинските жртви се жени и деца.
Бројот на загинати во Израел изнесува над 1.400.
2,3 милиони жители на Газа се борат со недостиг на храна, вода и лекови поради масовното воздушно бомбардирање на Израел и целосната блокада на енклавата.
