ГАЗА (АА) – По загубата на сопругата и децата во израелски воздушен напад, дописникот на Ал Џезира од Газа, Ваел ал-Дахдух, порача дека ќе продолжи да известува за интензивните бомбардирања на Тел Авив врз енклавата која е под опсада, јавува Анадолу.
„Ова никогаш нема да го замолчи нашиот глас. Новинарството е нашата благородна мисија“, изјави Ал Дахдух за Анадолу. Тој даде изјава еден ден по загубата на неговата сопруга, син, ќерка, внук и уште осум роднини во нападот врз домот во бегалскиот камп Ал-Нусејрат во централна Газа, каде што избегаа откако беа принудно раселени.
„Израел таргетира цивили и врши масакри врз цели семејства“, рече Ал Дахдух.
„Ова е дел од она низ што минуваат палестинските семејства во Газа секој ден“, додаде тој.
Ал-Дахдух ја прими веста за смртта на неговото семејство додека известуваше за израелските напади врз Газа од локалната канцеларија на катарската телевизија.
Телевизијата Ал Џезира објави видео од дописникот како го носи телото на својата ќерка в раце, и уште една снимка како гледа во телото на својот син кој лежи на земја во болницата.
И покрај својата загуба, новинарот изјави дека останува одлучен да продолжи со својата работа на медиумско покривање на израелските напади врз Газа.
Израел започна немилосрдни воздушни напади врз Појасот Газа по прекуграничниот напад на Хамас на израелска територија на 7 октомври.
Од почетокот на конфликтот на 7 октомври загинаа 7.028 Палестинци, од кои 2.913 деца, 1.709 жени и 397 стари лица, и 1.400 Израелци.
