АТИНА (АА) – Грција објави дека е запрепастена од воздушниот напад на болницата во северниот дел на Газа, што се случи синоќа, а во кој животот го загубија стотици луѓе, известува Анадолу.
Во соопштението на грчкото Министерство за надворешни работи објавено денес се наведува дека „се запрепастени од настаните што доведоа до болната загуба на животи“ во болницата „Ал-Ахли“ во Газа.
„Грција уште од првиот момент ја нагласи потребата од заштита на цивилите и зачувување на хуманитарните вредности и инсистира на тој став“, се вели во соопштението.
Државната новинска агенција АМНА објави дека поради смртоносниот воздушен напад и од безбедносни причини, премиерот Кирјакос Мицотакис се откажал од планираната посета на Израел.
„Новата безбедносна ситуација во Израел доведе до ревизија на претходниот план“, соопшти грчкото МНР.
