БЕЛГРАД (АА) – Меѓународниот саем на оружје и воена опрема „Партнер 2023“ беше отворен денеска во Белград, а според српскиот министер за одбрана, Милош Вучевиќ, на саемот ќе ги претстават своите производи 154 излагачи од Србија и од светот, јавува Анадолу.
Вучевиќ рече дека ќе бидат претставени репрезентативен дел од производите на одбранбената индустрија на Србија, како и компании од Германија, Франција, Австрија, Финска, Туркије и Кина.
Вучевиќ истакна дека оваа година се потпишани договори со домашни компании за опремување на Српските вооружени сили во вредност од 6,2 милијарди динари, дека за време на саемот се очекува да бидат потпишани договори во вредност од двојно повеќе, како и дека до крајот на годината се очекува на војската на Србија да ѝ биде испорачано огнено оружје од домашно производство.
Тој наведе дека до крајот на годинава се очекува испорака на системи за капитално оружје од увоз – транспортни авиони, чиј дел денеска пристигнува во Србија, и авиони Ербас Х45.
Како што соопшти српското Министерство за одбрана, од претходниот саем во 2021 година досега, Воено-техничкиот институт и домашната одбранбена индустрија на Србија развиле 66 нови средства, од кои 21 се „нулта“ серии кои се успешно произведени.
Саемот се одржува во халите 1, 4 и 2А, како и на отворениот простор на Белградскиот саем.
Ова е 11-ти саем за оружје што го организира Министерството за одбрана на Србија.
Саемот трае до 28 септември.
