реклама
„Гарантирана цена“ е ознаката која ги означува намалените цени со последната економска мерка. Иако сите маркети не ја ставија оваа ознака, минимално намалување на цените има, барем во оние маркети што ги посети ТВ21. На пример, лебот од 33 сега се продава за 30 денари. Најмалку 10% поевтино ќе можете да ги купите прехранбените производи кои се вклучени во оваа мерка, почнувајќи од денеска до 30 ноември.
Ова и е главниот проблем на мерката според економскиот аналитичар Бранимир Јовановиќ. Вели дека мерката важи многу кратко за да ги даде вистинските ефекти. Според него, цените треба да се замрзнат најмалку 6 месеци за граѓаните навистина да почувствуваат олеснување.
реклама
Иако министерот Бектеши рече дека оваа мерка ќе влијае на намалување на инфлацијата, особено во делот на храната, Јовановиќ вели дека такво нешто нема да се случи бидејќи според него за подобрување на стандардот на граѓаните, инфлацијата треба да биде од 1 до 2%.
Речиси идентични мерки воведоа Србија и Хрватска, во Хрватска дури производите со намалени цени имаат ознака “ограничени цени“, меѓутоа за разлика од кај нас, овие мерки таму ќе важат на неодредено време. Според Бранимир Јовановиќ, замрзнувањето на цените е добра економска мерка која во одредени случаи се користи и во ЕУ, но како што вели, доколку владата не ја продолжи мерката и по 30 ноември, постои опасност маркетите да ги напумпаат цените уште повеќе од тоа што биле.
реклама
