БАКУ (АА) – Министерството за одбрана на Азербејџан соопшти дека е започната антитерористичка операција со цел повторно воспоставување уставен поредок во Карабах, јавува Анадолу.
Во соопштението на Министерството се наведува дека во последните неколку месеци Ерменските вооружени сили во регионот Карабах во Азербејџан систематски отвориле оган врз позициите на азербејџанската Армија, продолжиле со поставување мини и со градење утврдувања и позиции, што довело до зголемување на тензиите.
Се додава дека е утврдено дека ерменските сили ги зајакнале своите позиции со жива сила, оклопни возила, артилериска опрема и други возила, ги оспособиле единиците за војна на високо ниво и воспоставиле единици како засилување.
Понатаму се наведува дека ерменските сили, исто така, ги засилиле и разузнавачките активности против азербејџанската Армија и презеле дејства како што е повторно поставување мини во деминираните области.
Во соопштението се потсетува дека цивили и полицајци загинале во експлозијата на мини поставени од ерменските сили на патот Ахметбејли-Фузули-Шуша во провинцијата Хојавенд.
– Закана за регионалниот мир
Истакнато е дека континуираното присуство на Ерменските вооружени сили во регионот Карабах во Азербејџан е во спротивност со одредбите на трипартитната декларација потпишана на 10 ноември 2020 година и дека претставува сериозна закана за регионалниот мир и стабилност.
„Антитерористичката операција е започната со цел да се имплементираат одредбите од трипартитната декларација, да се спречат пошироки провокации во економската зона Карабах, да се разоружаат единиците на Ерменските вооружени сили и да се отстранат од нашата територија, да се неутрализира нивната воена инфраструктура и да се овозможи безбедно враќање на цивилите во областите ослободени од окупација и повторно да се воспостави уставниот поредок на Република Азербејџан“, се наведува во соопштението.
Во овој контекст, позициите на Ерменските вооружени сили на линијата на фронтот и во длабочината на фронтот, како и борбените возила и воените објекти, се оневозможени со високопрецизно оружје.
„Цивилите и инфраструктурните објекти не се цел, се уништуваат само легитимните воени цели“, се додава во соопштението.
На крајот се нагласува дека Командата на мировните сили на Русија и раководството на Заедничкиот турско-руски центар за набљудување се известени за преземените мерки.
