реклама
Утрешната седница за потребата од донесување уставни измени ќе започне со непроменети ставови на опозицијата која не дава поддршка а бара предвремени избори. Премиерот Ковачевски вели дека 80-те гласови се потребни на граѓаните за да се продолжи европскиот пат, а очекува во Собранието да се отвори дискусија за ова прашање. Колку побрзо ги спроведеме уставните измени толку побрзо ќе станеме членка на Европската унија, порача Ковачевски.
„80 пратеници се потребни за глас за европска Македонија, а на Владата и требаат 61 пратеник за да може полноправно да одлучува да работи до избор на следна влада. Двотретинско мнозинство во Собранието за овие уставни измени е императив за секој граѓанин во државата. Кое е објаснувањето на ВМРО зошто е против. Таму нема во соопштението. Тоа е најново сега, бугарски диктат. И доаѓаат од Европска унија и велат ова не е бугарски предлог ова е предлог на Европската унија“, вели Димитар Ковачевски.
реклама
И министерот за надворешни работи Бујар Османи на ден пред одржувањето седница за уставните измени упати порака до пратениците.
„Од Вас ќе зависи дали со прифаќање на промената на Уставот ќе ги продолжиме разговорите по поглавјата за членство во Унијата или ќе запреме во преговорите на подолг рок. Одговорно кажувам дека ова не го правиме под диктат на Бугарија, ниту заради уцена од нејзина страна. Ова е компромис во преговорите откако нивниот меморандум до ЕУ за непризнавање на македонскиот јазик и нација не доби поддршка од земјите членки. Компромис со кој го заштитивме македонскиот јазик и идентитет“, додаде Бујар Османи.
реклама
И вчера по координацијата на пратеничката група на ВМРО-ДПМНЕ а и денеска преку кусо соопштение порачаа дека не го менуваат ставот.
„Пратеничката група на ВМРО-ДПМНЕ е јасна со континуиран став, уставни измени под овие услови и бугарски диктат нема да има. Пратеничката група на ВМРО-ДПМНЕ и коалицијата тоа го кажа и на Комисијата за уставни измени, ќе го повтори и на пленарната седница. СДС и ДУИ не можат уште долго да манипулираат со јавноста, народот ќе може да види дека власта нема пратеници за уставни измени“, велат од ВМРО-ДПМНЕ.
реклама
Седницата за предлогот за пристапување кон уставни измени е закажана за утре во 11 часот, а расправата може да трае најмногу 10 дена. Претседателот на Собранието Талат Џафери претходно најави дека доколку не се обезбеди потребното мнозинство ќе ја прекине седницата се додека не се обезбедат 80 гласови.
реклама
