БИРМИНГЕМ (АА) – Британското Министерство за одбрана поведе внатрешна истрага откако и-мејлови со доверливи информации биле пратени до Мали, близок сојузник на Русија, поради грешка при пишување, јавува Анадолу.
Електронската пошта била наменета за американската војска, која го користи домејнот „.mil“. Но официјалните лица ја пропуштиле буквата „i“, поради што пораките се пратени до западноафриканската држава Мали, која го користи домејнот „ml“.
Британските медиуми објавија дека мејловите не содржат информации што би можеле да ја загрозат оперативната безбедност на Велика Британија.
Мали е силен сојузник на Москва и е домаќин на платеници од руската група „Вагнер“ во борбата на земјата против бунтовничките групи.
Грешката се случува две недели откако американски официјални претставници потврдија дека милиони мејлови на американската армија со сензитивна содржина со години биле случајно праќани до Мали поради иста печатна грешка.
Ненамерната грешка резултира со изложување на високо сензитивни информации, како дипломатски документи, даночни пријави, лозинки и детали за патувањата на највисоките претставници.
За проблемот првпат пријавил холандскиот интернет-претприемач Јоханес Зурбер, кој управува со домејнот на Мали.
Зурбер за „Фајненшл тајмс“ изјави дека само од јануари собрал близу 117.000 погрешно насочени и-мејлови од Пентагон, а нивниот број бил многу поголем во претходните години.
Извор: www.aa.com.tr
