Претседателот, премиерката и тројца поранешни шефови на влади во Италија се појави на погребот. Од странските гости, највисоки државни претставници беа унгарскиот премиер и катарскиот емир
За поранешниот италијански премиер Силвио Берлускони денеска попладне беше организиран погреб со државни почести во катедралата Дуомо во Милано, додека во Италија денеска беше ден на жалост.
Илјадници луѓе се собраа пред катедралата кои според италијанските обичаи аплаудираа кога ковчегот со телото на Берлускони, прекриен со цвеќе, беше внесен внатре каде се наоѓаат бизнис и политичката елита на Италија.
Берлускони кој водеше три италијански влади меѓу 1994 и 2011 година, беше медиумски тајкун, а големо влијание имаше и во фудбалскиот бизнис, за повеќето Италијанци важи за највлијателната личност во Италија во изминатите неколку децении. Меѓутоа, тие се поделени околу тоа дали имал добро или лошо влијание.
Берлускони почина на 86-годишна возраст во понеделникот во болницата во Милано каде се лекуваше од хронична леукемија.
Меѓу највисоките државни претставници од странство кои присуствуваа на погребот денеска беа унгарскиот премиер Виктор Орбан и емирот од Катар, Шеик Тамим бин Хамад Ал Тани.
Од италијанскиот државен врв присутни беа премиерката Џорџа Мелони која му беше коалициски партнер на Берлускони и првото министерско искуство го стекна во една од неговите влади, како и претседателот Серџо Матарела. Присуствуваа и тројца поранешни премиери: Матео Ренци, Паоло Џентилони и Марио Драги.
Извор: 360stepeni.mk
