Протекувањето доверливи документи во кои се опишани плановите на САД и НАТО да му помогнат на Киев се чини дека е руска дезинформативна операција заради поттикнување сомнеж за планираната украинска контраофанзива, изјави денеска Михајло Подољак, политички советник на претседателот Володимир Зеленски.
Подољак за Ројтерс изјави дека документите што ги објави Њујорк Тајмс содржат „многу голема количина на фабрикувани информации“. – Ова се само стандардни елементи на оперативните игри на руското разузнавање. И ништо повеќе, рече Подољак во писмената изјава, пренесува Скај Њуз.
„Њујорк тајмс“ вчера објави дека Пентагон истражува како документи со детали за плановите за зајакнување на украинската војска за планирана офанзива биле објавени на социјалните мрежи оваа недела.
„Русија на сите начини се обидува да ја врати иницијативата“, рече Подољак. „Таа се обидува да влијае на сценаријата за украинските планови за контраофанзива. Сака да внесе сомнеж, да ги компромитира идеите и конечно да нè исплаши колку се „информирани“, додаде тој.
Украинските сили со месеци се соочуваат со руски напади на истокот на земјата, концентрирани околу градот Бахмут. Украина се надева дека ќе започне контраофанзива во наредните недели или месеци за да ја врати територијата што сега е под руска контрола.
„Њујорк тајмс“ објави дека се чини дека документите се модифицирани во одредени делови, односно нивната содржина е малку изменета во однос на она што било во оригиналите. Во еден дел е претставена проценка за загубите на украинската војска, но таа е многу повисока од досегашните западни проценки.
ИЗВОР: kurir.mk
