Австрија во шок по убиството на десет лица во средно училиште. Во земјата прогласена тридневна жалост, знамињата на владините објекти се спуштени на половина копје, а голем број настани се откажани.
Локалниот транспорт запре на една минута како почит кон загинатите во престолнината Виена додека пак жителите на Грац од синоќа се собираат на главниот плоштад каде палат свеќи. Шест девојки и три машки беа убиени во масакрот. Уште една девојка почина во болница. Седуммина од загинатите беа ученици.
„Познавам ученици кои учат во ова школо. Ми кажаа дека некои од нивните пријатели починаа во нападот, а други се повредени. Ова можеше да се случи и во моето училиште.“ – Арда Туркмен жител на Грац.
Од австриското министерство за внатрепшни работи велат дека покрај мотивот за нападот, непознато оставува и дали убиецот случајно или намерно ги избрал жртвите. Повредените биле пронајдени на повеќе локации во училиштето, вклучително и едно лице пред зградата. При претрес во домот на убиецот, пронајдена била бомба како и проштално писмо а во австриските медиуми се покрена и прашањето, како успеал да стигне до оружјето со кое е извршен нападот.
„Пронајдено е проштално писмо во аналогна и дигитална форма. Во него тој се збогува со своите родители. Но, од прошталното писмо не може да се заклучи никаков мотив и тоа е прашање за понатамошна истрага. Постои јасна постапка како некој може да набави огнено оружје. Очигледно, тој ги исполнил условите, инаку немаше да може легално да го набави оружјето.“ – Франц Руф директор на агенцијата за јавна безбедност на Австрија.
Убиецот, 21-годишен жител на регионот штаерска, во школото влегол опремен со пиштол и пушка. Тој бил невработен и го напуштил училиштето без да дипломира. Напаѓачот си го одзел животот веднаш откако го извршил нападот, најсмртоносен во поновата историја на Австрија. Во масакрот, загинаа 11 лица а уште 12 завршија со потешки повреди.
Извор: 24vesti.mk
