Џенета Рамуш, 20-годишно девојче од Скопје, за кое ТВ21 известуваше пред неколку месеци, живее со тешки болки и ограничувања поради епилепсија и сколиоза – сериозна деформација на рбетот што ѝ ја отежнуваше секојдневната подвижност и живот.
Таа не можеше да се движи без помош, а за неа секојдневно се грижи нејзината мајка Аида, која со огромна посветеност ја презела целата одговорност.
Состојбата на Џенета беше критична, а лекарите во Македонија не ѝ дадоа надеж за успешна операција, предупредувајќи ги на високиот ризик. Сепак, семејството не се откажа и бараше можност за лекување надвор од земјата.
На крајот, операцијата беше реализирана во болница во Косово. Зафатот траеше 6 часа и беше изведен од голем тим лекари поради ослабениот имунитет на Џенета, која не можеше да поднесе дополнителна доза на анестезија. И покрај сè, интервенцијата помина успешно, а Џенета веќе е вратена дома каде што и понатаму има потреба од постојана грижа од нејзината мајка.
„Изразувам најдлабока благодарност до сите хумани луѓе кои помогнаа во собирањето на средствата за операцијата, која чинеше 24 илјади евра. Многу сум благодарна за секоја помош што ни беше дадена. Без вас, немаше да можеме да го направиме овој голем чекор“, вели Аида Рамуш.
Иако операцијата е направена, патот до целосно закрепнување сè уште е долг и бара многу грижа и поддршка. Мајката и ќерката продолжуваат да се надеваат на подобра иднина и ден кога Џенета ќе може да оди сама, без ничија помош.
ИЗВОР: ТВ 21
